د ریاستالوزرا اقتصادي معاونیت وایي، د تېر کال په پرتله سږکال هېواد کې د غنمو حاصلات ۱۳ سلنه زیات شوي.
افغانستان د نړۍ یو له هغو هېوادونو څخه دی، چې د کرنې سکتور یې د صنعت او خدماتو ترڅنګ د کورني ناخالص تولید مهمه برخه جوړه وي.
دغه راز د هېواد زیاته وګړي په کرنه او مالدارۍ بوخت دي او د ډیریو کورنیو عواید د کرنې له برخې څخه تمولیږي.
د افغانستان اسلامي امارت د کرنې سکتور اهمیت ته په کتو د نورو سکتورونو ترڅنګ د دغه سکتور لا پرمختګ په خپلو کاري لومړیتوبونو کې نیولی دی.
اسلامي امارت د غنمو د حاصلاتو د زیاتوالي په برخه کې د بسټیزو کارونو او اسانتياوو لکه؛ پر بزګرانو د ۷۰ زره ټنه اصلاح شویو تخمونو وېشل، د کرنیزو کانالونو بیارغونه او جوړل، پر بزګرانو د کیمیاوي سرو وېشل،، د هېواد په بېلا بېلو برخو کې د اوبو زېرمه کولو په موخه د کوچنیو بندونو جوړول، د کوکنارو د کرکېلې بندېدل او د بدیل کښت په توګه د غنمو کرل، پر بزګرانو د کرنیزو درملو وېشل، بهر ته د غنمو د قاچاق مخنیوی، په کور دننه د غنمو ساتلو لپاره د سیلوګانو فعالول، له بزګرانو څخه په مناسبه بېه د اضافي غنمو پېرل او له پرمختللې ټکنالوژۍ څخه استفاده هغه هڅې دي، چې په دې برخه کې لومړیتوب ورکړل شوی دی.
د ریاستالوزرا اقتصادي معاونیت زیاته کړې، همدا لامل دی چې د تېرکال په پرتله سږکال د هېواد په کچه د غنمو په حاصلاتو کې ۱۳ سلنه زیاتوالی راغلی دی.
د ریاستالوزرا اقتصادي معاونیت وایي، په روان لمریز کال کې د هېواد په کچه پر ۲.۱۴ میلیونه هکټاره ځمکه غنم کړل شوي و، چې د تېر کال په پرتله د کر ځمکه کې شپږ سلنه زیاتوالی راغلی دی او په پایله کې یې ۴.۹ میلیون میټریک ټنه حاصلات راټول شوي دي.
د یادونې وړ ده، چې د غنمو دغه حاصلات تر ډېره د هېوادوالو اړتیاوې پوره کولی شي.