د ننګرهار ولایت په پچيراګام ولسوالۍ کې د اوږدې مودې شخړې له منځه وړلو لپاره د ۱۲ کورنیو ترمنځ سوله شوې.
دغه روغه جوړه د ننګرهار ولایت مرستیال مولوي سعید احمد بنوري په هڅو او د پیر نورمحمد نوراني په همکارۍ ترسره شوې.
دغهراز په دې ترڅ کې ګڼ شمېر نورې کورنۍ هم د سولې او پخلاینې لپاره تشویق شوي دي، چې په نږدې راتلونکي کې به پخلا شي.
د یادې سیمې قومي مشران وايي؛ دا شخړې چې د کلونو لپاره یې د کورنیو ترمنځ تاوتریخوالی رامنځته کړی و، د خلکو ژوند يې سخت کړی و، اوس د روغې جوړې وروسته یادې کورنۍ په سوله او ارامتیا کې ژوند کوي او په وضعیت کې يې مثبت بدلونونه رامنځته شوي دي.
د ننګرهار ولایت مرستیال والي د روغې جوړې د کمېسیون له غړو څخه مننه کړې او د پاتې شخړو د حل په برخه کې یې د هغوی لا زیاتو هڅو ته هیله ښودلې.
مولوي سعید احمد بنوري ویلي، د ننګرهار په ټولو ولسوالیو کې د روغې جوړې پروسه په بریالیتوب سره روانه ده او موږ له ولسونو سره په ګډه کار کوو ترڅو د سولې، امنیت او ټیکاو فضا لا پیاوړې کړو.
نوموړي همدارنګه زیاته کړې، ډېر ژر به د پچيراګام په ګډون د دې ولایت ټولو لرو پرتو سیمو کې د خلکو د اړتیاو پر اساس پرمختیایي او ټولنیزې پروژې پلې شي، چې د سیمې د خلکو لپاره به اوږدمهاله ګټې ولري.
د ولایت مرستيال په ورته مهال د لسګونو ولسي وګړو ستونزې او وړاندیزونه هم اورېدلي او اړونده ادارو ته يې د قانوني اجرااتو په موخه راجع کړي دي.
مولوي سعید احمد بنوري همداراز د بېلا بېلو ادارو مسولينو سره په ليدنه کې دوی ته په يو شمېر برخو کې اړینې سپارښتنې کړي.