د المپیک کمېټې، بدني روزنې او ورزش عمومي رياست اړوند د هنډبال ملي فدراسيون له لوري د ياد رياست په ۵۰۰ کسيز جمنازيوم کې د ۱۶ ولايتونو ترمنځ ملي لوبډلې ته د غوره لوبغاړو ټاکلو په موخه د هنډبال درېيم پړاو ټاکنيزې سيالۍ پيل شوې.
په دې سياليو کې د بلخ، باميان، جوزجان، سرپل، غور، کونړ، کندز، لوګر، لغمان، ننګرهار، ميدان وردګ، باميان، پروان، هرات، کابل منتخب او کابل الف لوبډلو گډون کړی.
په دې سیالیو کې لومړۍ لوبه د ننګرهار او لوګر لوبډلو ترمنځ وشوه، چې په پايله کې یې ننګرهار خپلې سيالې لوبډلې ته د ۱۹ پر ۸ امتيازونو په توپير ماتې ورکړه او بريا يې پخپل نوم کړه.
د دغو سياليو د پيل په مراسمو کې د المپیک کمېټې، بدني روزنې او ورزش عمومي رييس مولوي احمد الله وثیق ویلي، چې الحمدلله د هېواد ورزش د نورو کلونو په پرتله ډېره وده کړې ده.
نوموړي ورزشکارانو ته ډاډ ورکړی، چې د هېواد ورزش اداره به هيڅ ډول امکانات له دوی څخه ونه سپموي.
د ښاغلي وثیق په وینا؛ د امن له برکته د نورو هېوادونو روزنکي هېواد ته راځي او له ورزشکارانو سره په بېلابېلو برخو کې خپلې تجربې شریکوي.
یادې سيالۍ به لس ورځې دوام وکړي او په پای کې به ۱۸ ورزشکاران د هېواد هنډبال ملي لوبډلې ته غوره شي.