د عامې روغتیا وزیر مولوي نورجلال جلالي په خپل کاري دفتر کې د افغانستان لپاره د UNFPA سازمان له مشر کوابینا اسانتي او د دې سازمان له جینوا څخه راغلې استازې شوکو سره لیدنه کړې.
په دې لیدنه کې په سپینو سیمو کې د روغتیايي ځالو جوړېدو، د جوړو شویو روغتیايي ځالو د خدمتونو پر پراخوالي د روغتیايي پرسونل په ظرفیت لوړونې، د مور او ماشوم لپاره د ځانګړو روغتیايي خدماتو پر وړاندې کولو او نور موضوعاتو خبرې شوي دي.
د عامې روغتیا وزیر د یاد سازمان له استازو سره د خپلو خبرو په ترڅ کې په ظرفیت لوړونې، د لا نورو نویو روغتیايي ځالو جوړولو، د خدماتو پر پراختیا او راتلونکي کې د نويو روغتیايي ځالو د جوړېدو پر مهال د معیاري او نویو نقشو عملي کولو غوښتنه کړې.
مولوي نورجلال جلالي د لرې پرتو سیمو اوسېدونکو لپاره روغتیايي خدماتو برابرول خپل لومړیتوب یاد کړی او ویلي يې دي؛ په دې برخې کې به دوامداره هڅې کوي، ترڅو تر ټولو سپینو او لرې پرتو سیمو اوسېدونکو ته روغتیايي خدمات ورسوي.