د ریاست الوزرا سیاسي مرستیال مولوي عبدالکبیر په سپېدار ماڼۍ کې د لوګر ولایت د څرخ ولسوالۍ له یو شمېر قومي مشرانو او مخورو سره لیدنه کړې.
په دې ليدنه کې قومي مشرانو له اسلامي امارت سره د خپلې همکارۍ او ملاتړ ډاډ ورکړی او ویلي يې دي، په افغانستان کې اسلامي نظام د ټولو افغانانو هیله وه او د حاکميت لپاره يې افغانانو بېسارې قربانۍ ورکړې دي.
دوی همدا راز په یاده ولسوالۍ کې د ښوونځيو او مدرسو، د سړکونو او استنادي دېوال جوړولو او په یاده سیمه کې د مخابراتي شبکو د ستونزو حل غوښتنه کړې.
د ریاست الوزرا سیاسي مرستیال له قومي مشرانو څخه په مننې ویلي، دا یو څرګند حقیقت دی چې د اسلامي نظام په ټینګښت کې ولس له اسلامي امارت سره اوږه په اوږه ولاړ و او له مجاهدینو سره یې هر راز همکارۍ کړې دي.
مولوي عبدالکبیر زیاته کړې، اسلامي امارت ته ټول افغان ملت یو برابر دی او له توپیري چلند پرته ټولو افغانانو ته خدمت خپل مسولیت بولي.
نوموړي یادو قومي مشرانو او مخورو ته ډاډ ورکړی، چې د حل په موخه به يې ستونزې له اړوندو ادارو سره شریکې شي.