له پیښو سره د مبارزې تیاري ملي ادارې رییس ملا نورالدین ترابي او د ډنمارک د ګډوالو نړیوالې موسسې ترمنځ دوه هوکړه لیکونه لاسلیک شول.
ملانورالدین ترابي د ډنمارک موسسې پلاوي ته د ښه راغلاست ترڅنګ ویلي، ټول موسسات او دولتي ادارې باید په ګډه کار وکړو ترڅو د طبعي پیښو او غیر طبعي پیښو پر وړاندې مبارزه وکړو او پر وخت مو خلګ له مرستو څخه برخمن شي.
نوموړي زیاته کړې؛ باید ټول موسسات خپلو مرستو ته دوام ورکړي، ترڅو افغان اولس دفقر او بي وزلۍ څخه وژغورل شي.
د ډنمارک کډوالو نړیوالې موسسې رییس دانیا الشریف ویلي؛ دنورو هېوادونو په ګډون شاوخوا ۲۵ کاله کیږي، چې یاده موسسه په افغانستان کې هم فعالیت کوي او د کډوالو، جنګ ځپلو، دماین پاکۍ او په بیړنیو حالتو کې په طبعي او غیرطبعي پیښو کې د افغانانو سره مرسته کوي.
نوموړي همدارنګه له پیښو سره د مبارزې تیاري ملي ادارې چارو څخه خوښي څرګنده کړې او زیاته کړې یې ده، پر وخت یې زموږ کارونه خلاص کړي دي او زموږ ملاتړ یې کړی دی.
دغهراز د لمړي هوکړه لیک له مخې، چې د یو میلیون، ۴۹۳ زره او ۱۵ امریکایي ډالرو په ارزښت دي، په کابل، کاپیسا، پروان، بامیان، کندهار، زابل، هلمند، نیمروز فراه، بادغیس، لغمان، او کونړ ولایتونو کي د یوه کال په موده کې بېلابېلې پروژې لکه د ۷۰۰ ښونیزې او روغتیایي مرکزنو، ناچاودو توکو څخه پاکول او وروسته د سولرونو نصبول شامل دي، پلې کېږي.
او دویم هوکړه لیک د یو میلیون، ۸۴۴ زره او ۴۱۴ ډالرو په ارزښت په کابل، پروان، لوګر، میدان وردګ، غزني، کندهار، زابل، هلمند، هرات، فراه، بادغیس، ننګرهار، کونړ، او نورستان ولایتونو کي د بیړنیو حالتو د بشر دوستانه پیاوړتیا او محلي ماین پاکۍ په برخه کې د یوه کال په موده کې به ولګول شي.