د افغانستان برېښنا شرکت عمومي اجراییوي رییس ډاکټر عبدالباري عمر د خپل کار په دفتر کې د ۷۷ ترکي کمپنۍ له رییس سره لیدنه وکړه او د کجکي برېښنا تولید کارخونې په ګډون یې د لمریزې، بادي او ګازو څخه د برېښنا تولید پروژو اسانتیاوو، پانګونو او همکاریو په اړه خبرې وکړې.
افغانستان کې د ۷۷ ترکي کمپنۍ استازي سلیمان جلیو د کجکي برېښنا تولید کارخونې پرچاوې تنظیم او اوبو کچې لوړولو په اړه د خپلو کارونو په تړاو د برېښنا شرکت عمومي رییس ته معلومات ورکړل.
سلیمان جلیو دې ناسته کې د سروبي دویم ۱۲۰ مېګاواټه او هرات کي ۲۰۰ مېګاواټه بادي برېښنا پروژو په اړه معلومات وړاندې کړل او د افغانستان برېښنا شرکت رییس څخه یې د همکارۍ غوښتنه وکړه.
د افغانستان برېښنا شرکت عمومي اجراییوي رییس ډاکټر عبدالباري عمر د ۷۷ ترکي کمپنۍ مسول ته د دوی د پلې کېدونکو پلاني پروژو او بانکي همکارۍ برخه کې د همکارۍ بشپړ ډاډ ورکړ او همدارنګه یې د کندهار- کجکي لین اصلاح او پیاوړتیا چارو په اړه معلومات ورکړل.
ښاغلي عمر د ۷۷ ترکي کپمنۍ استازي له همکاریو مننه وکړه او افغانستان کې د برېښنا تولید شته زمینو څخه د ګټي اخیستنې په موخه یې د یادې کمپنۍ څخه پانګونې هیله وکړه، څو د نوې کېدونکې برېښنا تولید پراختیا سره د چاپیریال ککړتیا مخنېوی وشي او هېواد کې برېښنا ته اړتیا پوره شي.
د ترکي ۷۷ کمپنۍ مسول سلیمان جلیو یادونه وکړه، چې په افغانستان کي له شته پانګونې خوښ دی او نورې پانګونې ته هم لېوالتیا لري.
همدارنګه یې د افغانستان برېښنا شرکت عمومي اجراییوي رییس ډاکټر عبدالباري عمر ته ترکیې ته د تګ بلنه ورکړه، تر څو د دوی له لورې د برېښنا جوړ شوي سیستمونه او پروژې له نږدې وویني.