د روسیې د بهرنیو چارو وزیر سرګي لاوروف د مسکو فارمټ په شپږمه مشورتي ناسته کې ویلي؛ مسکو غواړي چې له افغانستان سره په سیاسي او اقتصادي برخو کې اړیکې وپالي.
نوموړي زیاته کړې: “موږ په افغانستان کې د امنیتي ګواښونو او نشهيي توکو پر وړاندې د اسلامي امارت مبارزه ستایو او یو شمېر روسي شرکتونو د کرنې، کانونو او ترانسپورټ په برخو کې غواړي، چې افغانستان کې پانګونه وکړي.”
د روسیې د بهرنیو چارو وزیر ټینګار کړی، چې د افغانستان د استازو له ګډون پرته د دې هېواد د مسایلو په تړاو خبرې نشي کېدای. دغهراز افغانستان کې له واکمنو چارواکو سره اساسي تعامل د سیمې د امنیت او اقتصادي پراختیا لپاره اړین دی.
ښاغلي سرګي لاوروف په لوېدیځ غږ کړی، چې د افغانستان کنګل شوې شتمنۍ دې ازادې او د دغه هېواد پر بانکي سکټور لګېدلي بندیزونه دې لیرې کړي.
د دې تر څنګ د افغانستان لپاره د چین د بهرنیو چارو وزارت ځانګړي استازي ویلي؛ هېواد يي غواړي چې افغانستان د سیمهییز اتصال په مرکز بدل شي.
نوموړي زیاته کړې: “چین د اسلامي امارت د اقتصاد محوره سیاست ستاینه کوي او غواړي، چې په وچه کې راګیر افغانستان د سیمهییز اتصال په مرکز بدل شي.”
په دې غونډه کې د افغانستان د بهرنیو چارو وزیر مولوي امیرخان متقي د یوه ګډ پلاوي په مشري ګډون کړی و.
ښاغلي متقي په یاده غونډه کې ویلي، چې د اسلامي امارت له بیا واکمنېدو وروسته د سیمې له هېوادونو سره د سیاسي ثبات سربېره، د اقتصادي ودې او پراختیا په برخو کې کوټلي ګامونه پورته شوي او اسلامي امارت ژمن دی چې د سیمې او نړۍ له هېوادونو سره مثبتې اړیکي وپالي.
نوموړي زیاته کړې، چې اسلامي امارت په تېرو درېیو کلونو کې ورانکاره ډلې له منځه وړې او په بشپړ ډول یې د نشهيي توکو د قاچاق، پېر او پلور مخه نیولې ده. دغهراز هېچاته یې اجازه نه ده ورکړې، چې د افغانستان له خاورې نورو هېوادونو ته زیان ورسوي.
د سیاسي چارو شنونکي د مسکو فارمټ مشورتي ناسته د هېواد په سیاسي ډګر کې ستر ګام بولي.
د مسکو فارمټ شپږمه مشورتي ناسته د افغانستان اسلامي امارت، روسیې، هند، چین، ایران، پاکستان، اوزبیکستان، قزاقستان، قرغیزستان، تاجیکستان او ترکمنستان هېوادونو د استازو په ګډون د روسیې په پلازمېنه مسکو کې ترسره شوه.