د المپیک کمېټې، بدني روزنې او ورزش عمومي رییس مولوي احمد الله وثیق د دې ادارې فني او مسلکي مرستیال حافظ احمد جان ځدراڼ، په قطر کې د افغانستان سفیر ډاکټر محمد نعیم وردګ او مله پلاوي د قطر هېواد د فوټبال فدراسیون د نړیوالو اړیکو له مسول محمد خالد فخرو سره لیدنه کړې.
په دې لیدنه کې د هېواد د فوټبال فدراسیون پر وروستیو لاسته راوړنو خبرې شوي او هم په دې برخه کې شته زمینې روښانه شوې دي.
د قطر هېواد د فوټبال فدراسیون د نړیوالو اړیکو مسول په افغانستان کې د فوټبال شته وړتیاوې د دې ورزش د پرمختګ بنسټیز لامل بللی او هم یې د افغانستان له فوټبال سره د هر اړخیزې همکارۍ ژمنه کړې.
نوموړي د ښوونیزو او روزنیزو سیمنارونو او ملي لوبډلې ته د روزونکي په برخه کې د همکارۍ ډاډ ورکړی دی.