د اطلاعاتو او کلتور وزير ملا خيرالله خيرخواه کندهار ولایت ته د رسمي سفر په ترڅ کې د ياد ولایت د ارغستان ولسوالۍ مرکز په يوه ولسي غونډه کې ګډون وکړ.
په دې ولسي غونډه کې د کندهار د هوايي ځواک قومندان ملا محمد عيسی ياسين، د کندهار ولایت د علماوو شورا غړي مولوي عبدالنافع، د ارغستان ولسوال مولوي سعد، د ټولنې د بېلابېلو قشرونو استازو، قومي مشرانو او مخورو شتون درلود.
ملا خيرالله خيرخواه ویلي، د ارغستان ولسوالۍ ولسونو هر وخت د اسلامي نظام د غښتلي کولو هڅې کړې دي او ياده سیمه د جهاد مهم مرکز پاتی شوی دی.
نوموړي زياته کړې؛ د علماوو، د امارت مسولینو او قومي مشرانو دنده ده، چې بايد د اسلامي نظام مزاياوې او ګټې تر خلکو ورسوي.
ښاغلي خیرخواه همداراز د يادې سېمې پر مسولینو او مشرانو غږ کړی، چې لاسونه سره ورکړي، یووالی رامنځته کړي او د اسلامي امارت په هره پریکړه باندې قناعت وکړي.
په غونډه کې د کندهار ولایت د هوایي ځواک قومندان، د علماوو شورا غړي، د سیمې یو شمېر مشرانو او شخصیتونو هم ویناوې کړې دي.
دوی هیله څرګنده کړې، چې د دې ډول غونډو په ترسره کولو سره به د ولسونو ترمنځ ملي یووالي او پرمختګ ته لا ډېره وده ورکړل شي.