امارت د ریاست الوزرا اداري مرستیال مولوي عبدالسلام حنفي د هېواد د بېلابېلو سیمو له یو شمېر علماوو او مخورو سره لیدنه کړې.
په دې لیدنه کې علماوو او مخورو په هېواد کې د سراسري امنیت او ثبات په ټینګښت خوښي ښودلې او ویلي يې دي؛ اسلامي امارت د زرګونو علماوو او نورو هېوادوالو د کوښښونو او سرښندنو په پایله کې په هېواد کې واکمن شوی، چې دا د ټولو افغانانو د ویاړ لامل دی.
دوی زیاته کړې، د هېواد ټول علما د نظام د پیاوړتیا او عامه اذهانو د تنویر په خاطر یو د بل ترڅنګ ولاړ دي او د اسلامي امارت مسولینو سره په همکارۍ هڅې کوي.
د ریاست الوزرا اداري مرستیال مولوي عبدالسلام حنفي په دې لیدنه د خوښي څرګندولو ترڅنګ د اسلامي امارت نظام د پیاوړتیا په برخه کې د هېواد د علماوو د هڅو او سرښندنو مننه کړې.
مولوي عبدالسلام حنفي ویلي، د هېواد ټول علما او مشران د دې ترڅنګ چې د هېواد د اولادونو د روزنې مسولیت لري، د خلکو د بېلا بېلو اقشارو ترمنځ د یووالي او ورورولۍ د ټینګښت په موخه هم مکلفیت لري او اړینه ده، چې ټول د اباد او پرمختللي افغانستان لپاره هڅې وکړو.