له پېښو سره د مبارزې تیاري ملي ادارې رییس ملا نورالدین ترابي په خپل کاري دفتر کې په کابل کې مېشت د ترکمنستان سفیر خواجه عوضوف سره لیدنه کړې او د بشري مرستو په اړه یې ورسره خبرې کړې دي.
په دې ناسته کې ملا نورالدین ترابي د ترکمنستان سفیر او ورسره مل پلاوي ته د ښه راغلاست ترڅنګ ویلي، افغانستان او ترکمنستان دوست هېوادونه دي او د دواړو هېوادونو ترمنځ د دوستۍ پر پیاوړتیا یې ټینګار کړی.
ښاغلي ترابي په اقتصادي برخه او بشردوستانه مرستو کې د ترکمنستان له همکاريو څخه د مننې ترڅنګ زیاته کړې، موږ تل د ترکمنستان هېواد له مرستو او همکاریو یادونه کړې.
له پېښو سره د مبارزې تیاري ملي ادارې رییس د ترکمنستان له مرستو څخه د مننې ترڅنګ د بشردوستانه مرستو د دوام غوښتنه کړې.
نوموړي همدارنګه په هېواد کې د طبیعي پېښو او بېوزلۍ د زیاتوالي په اړه یادونه او د اړتیا له مخې یې د بشردوستانه مرستو غوښتنه کړې.
ورپسې د ترکمنستان سفیر خواجه عوضوف له پېښو سره د مبارزې تیاري ملي ادارې رییس له مېلمه پالنې څخه د مننې ترڅنګ د افغانستان او ترکمنستان ترمنځ د دوستۍ یادونه او د دواړو هېوادونو ترمنځ د دوستۍ د پراختیا غوښتنه کړې.
خواجه عوضوف ویلي؛ موږ د افغانستان خلکو لپاره له ملګرو هېوادونو څخه د بشردوستانه مرستو د غوښتنې او راجلبولو په موخه د همکار په توګه شتون لرو.
نوموړي د افغانستان لپاره په تېره یوه میاشت کې د خپلو مرستو یادونه کړې او ویلي يي دي، ستاسو د غوښتنې له مخې به خپلو مرستو ته دوام ورکړو.
په پای کې دواړو خواوو په ټولو برخو، په ځانګړي توګه د پېښو په مدیریت کې د دوه اړخیزه دوستۍ او همکارۍ په پراختیا ټینګار کړی.