شیخ عبد الغفار بحر پرون د ۱۴۴۶ هـ ق د ربيع الثاني ۶مه چې د ۲۰۲۴ د اکټوبر ۹مې سره سمون خوري د باورليک کاپي د اوزبیکستان د بهرنیو چارو وزیر بختیار سعیدوف ته وسپارله.
په دې مراسمو کې ښاغلی سعیدوف د اسلامي امارت سفیر ته ښه راغلاست ووایه او دا یې د اوزبیکستان او افغانستان ترمنځ د اړيکو په پراختیا کې مهم ګام وباله.
نوموړي وویل؛ اوزبیکستان او افغانستان ګټې شریکې دي او په تېرو درې کلونو کې ښه اقتصادي پرمختګ شوی، چې د سفیر په راتګ سره به د دواړو هېوادونو اړیکې لا پراخې شي.
عبدالغفار بحر وويل، خوښ یم چې د اسلامي امارت د رسمي سفیر او فوق العاده استازي په توګه په اوزبیکستان کې خپله دنده پيلوم.
ښاغلي بحر د دواړو هېوادونو ترمنځ لوړې کچې ته د اړيکو پورته کیدل یو مهم فصل وباله او د لا قوي کیدو او پراخیدو هیله یې وکړه.
همداراز نوموړي د افغانستان په اړه د اوزبیکستان د نیک نیت ستاینه وکړه او اوزبیکستان یې د افغانستان ورور هیواد و باله.
ښاغلي بحر په افغانستان کې راغلی ثبات یو ښه فرصت وباله او زیاته یې کړه، چې افغانستان کې د پانګونې لپاره ښه زمینه برابره شوې ده، چې باید اعظمي استفاده ترې وشي.
په پام کې ده، چې د اسلامي امارت سفير به په نږدې راتلونکي کې د باورليک اصل د اوزبیکستان ولسمشر شوکت میرضیایف ته وړاندې کړي.