د افغانستان اسلامي امارت د بهرنیو چارو وزارت بلوچستان ایالت دوکۍ سېمه کې د سکرو کانونو په کاریګرو د ناپېژانده وسلوالو بریدونه چې له امله یې د څلورو افغانانو په ګډون ۲۰ تنه کاریګر شهیدان شوي، په کلکو ټکو غندلي دي.
د بهرنیو چارو وزارت د قربانیانو کورنیو ته د تسلیت د مراتبو په وړاندې کولو سره له هغوی سره خپله ژوره خواخوږي څرګنده کړې او د څښتن تعالی له دربار څخه یې شهیدانو ته د فردوس جنت او ټپیانو ته د عاجلې روغتیا غوښتنه کړې.
یاد وزارت همدا راز د پاکستان په حکومت غږ کړی، چې د دا ډول پېښو د مخنیوي په پار لازم اقدامات ترسره کړي.
د بهرنیو چارو وزارت په کوېټه کې د افغانستان اسلامي امارت لویې قونسلګرۍ ته دنده سپارلې ده، چې افغانستان ته د افغانانو د جنازو د انتقال په اړه اړینې اسانتیاوې برابرې کړي.