صنعت او سوداګري وزارت وایي، چې ټاکل شوې د افغان-قزاق ګډ نندارتون د روانې اکټوبر میاشتې (له ۱۹مې-۲۲مې نېټې) د قزاقستان په الماتا ښار کې جوړ شي.
د یاد وزارت په وینا؛ دې نندارتون کې به د افغانستان تولیدات او محصولات په ۶۷ غرفو کې نندارې ته وړاندې شي.
د افغان ګډونوالو غرفې د صنعت او سوداګري وزارت کې د سکټوري خونو او د هېواد د غالیو تولیدونکو او صادرونکو اتحادیې د استازو په حضور کې د رڼې پچې اچونې له لارې مشخصې شوې دي.
دغه وزارت زیاتوي، په دې نندارتون کې د سوداګریز تواصل کنفرانس، د افغانستان د کورنیو تولیداتو او محصولاتو نندارې ته اېښودل او د دواړو هېوادونو د مسولینو ترمنځ دوه اړخیزې ناستې شاملې دي.