ملي دفاع وزارت وایي؛ د عبدالله بن مسعود رض د جګړه ايزو ګډو زده کړو قوماندانۍ د مرکزي قطعاتو او سیمه ایزو قول اردوګانو څخه ۲۲۳ تنه ځوان منسوبین د توپچي، مخابرې، نښه ويشتلو او سرحدي کورسونو له ځانګړو مسلکي زده کړو څخه د یو لړ مراسمو په ترڅ کې فارغ شول.
په دې مراسمو کې د ملي دفاع وزارت د تعلیماتو او پرسونل معینیت مرستیال مولوي باز محمد حمیدي د عبدالله بن مسعود رضي الله عنه د جګړه ایزو ګډو زده کړو قوماندان مولوي نصیب الله مدني ګڼ شمېر مسولینو او منسوبینو ګډون درلود.
مولوي باز محمد حمیدي د وینا پر مهال دفاعي ځواک د اسلامي او ملي ارزښتونو ساتونکي ياد کړي او ویلي یې دي؛ هغه پوځ چې په فکري او مسلکي زده کړو سمبال وي، کولی شي په هر ډول شرایطو کې د جګړې د ډګر ګټونکی شي.
نوموړي فارغ شویو ځوان منسوبیو ته په خطاب کې زیاته کړې؛ تقوا غوره کړئ، د مشرانو د اوامرو اطاعت وکړئ او اسلامي نظام څخه د دفاع او ساتنې په موخه مسلکي زده کړې او مهارتونه ترلاسه کړئ.
ورته مهال نویو فارغانو مسولینو ته ډاډ ورکړی، چې د ترلاسه کړو مسلکي زده کړو او قوي ایماني جذبې پر مټ به د هېواد له خپلواکۍ، ځمکنۍ بشپړتیا او اسلامي ارزښتونو څخه په مېړانه ساتنه کوي.