د افغانستان، عمان او هانګکانګ ترمنځ د درې اړخیزې لوبلړۍ په درېیمه لوبه کې افغان الف کرېکټ ملي لوبډله د عمان پر وړاندې د لوبې ډګر ته ښکته شوه.
د دې لوبې بچه عمان لوبډلې وګټله او افغان ابدالیانو ته یې د توپوهنې بلنه ورکړه.
افغان ابدالیان لوبډلې په لومړۍ پاڼۍ کې دروېش رسولي د سلیزې او کریم جنت د نیمه سلیزې پرمټ د خپلو ۳ لوبغاړو په زیان ۲۱۱ منډې جوړې کړې او سیالې عمان لوبډلې ته یې د ۲۱۲ منډو هدف وټاکه.
د افغان لوبډلې په ګټه دروېش رسولي ۱۰۹*، کریم جنت ۶۰* او شاهدالله کمال ۲۲ منډې جوړې کړې.
پر وړاندې یې عمان لوبډلې په ۲۰ اورونو کې کې د ۷ لوبغاړو په سوزېدو ټولټال ۱۶۷ منډې جوړې کړې او د هدف په پوره کولو کې پاتې راغی.
په دې پاڼۍ کې افغان لوبډلې په ګټه فریدون داودزي او کریم جنت ۲ ـ ۲ ویکټې واخیستې.
د افغانستان الف کرېکټ ملي لوبډلې د درې اړخیزې لوبلړۍ په خپله دویمه لوبه کې عمان لوبډلې ته د ۴۴ منډو په ستر توپیر ماتې ورکړه او په روانه لوبلړۍ کې یې د پرلپسې دویمې بریا په خپلولو سره د دې سیالیو پایلوبې ته لار وموندله.
درویش رسولي په ۱۰۹ منډو د دې لوبې غوره لوبغاړی شو.
افغان لوبډلې له دې وړاندې په خپله لومړۍ لوبه کې هانګکانګ ته د ۷ ویکټو په ستر توپیر ماتې ورکړې وه.
افغانستان به د دې سیالیو پایلوبه کې نن سهشنبه ماسپښین د هانګکانګ پر وړاندې ډګر ته ښکته شي.