د الجزیرې خبري شبکې د راپور له مخې، غزه کې د نن سېشنبې له سهار راهیسې د اسرائیلي یرغلګرو په بریدونو کې ۲۹ فلسطینیان شهیدان شوي.
په دې بریدونو کې د غزې په سویل کې یو کور هم په نښه شوی، چې درې فلسطینیان پکې شهیدان شوي.
دغهراز د خان یونس په ختیځ کې د برید له امله ۶ نور فلسطینیان شهیدان شوي دي.
غزه کې لا هم اسرائیلي وحشتونه دوام لري، چې له امله یې په ورځني ډول لسګونه کسان شهیدان او ټپیان کېږي.
د غزې شمالي سیمې لا هم د صهیونیستي عسکرو تر محاصرې لاندې دي او پر بېلابېلو برخو یې بریدونه جاري ساتلي.
د ملګرو ملتونو مشر انتونیو ګوتېرش د شمالي غزې په سیمو کې د اسرائیلو بریدونو له امله د لوی شمېر ملکي تلفاتو غندنه کړې ده.
د غزې په دوو شمالي ښارګوټو کې د اسرائیلي عسکرو د محاصرې او بریدونو له امله لږ تر لږه ۲۰۰ فلسطینیان شهیدان شوي، چې ډېری یې ښځې او ماشومان دي.
ملګري ملتونه وايي، چې د دې عملیاتو له امله ۴۰۰ زره فلسطینیان کلابند او د خوړو له کمښت سره مخ دي.