د اقتصادي چارو یو شمېر کارپوهان د قزاقستان په الماتا ښار کې د افغاني تولیداتو او محصولاتو د دویم نندارتون جوړول د بازار موندنې او پلور لپاره یو ښه فرصت ګڼي.
دوی وايي، چې د الماتا په نندارتون کې د اسلامي امارت د پلاوي ګډون او د دوه اړخيزو ناستو جوړول به د افغانستان او قزاقستان ترمنځ د سوداګريزو اړيکو د پياوړتيا او پراختيا سبب شي.
هممهاله د غالیو د اتحادیې رییس عبدالمنان حیدري وايي، چې د قزاقستان بازارونه د افغاني محصولاتو او تولیداتو د خرڅلاو لپاره ښه فرصت دی او له دې لارې یاد محصولات منځنۍ اسیا او اروپايي هېوادونو ته رسېدلای شي.
د یادونې وړ ده، چې د افغانستان د صنعت او سوداګري د وزیر نورالدین عزیزي په مشري د اسلامي امارت ۲۵۰ کسیز پلاوي د تېرې جمعې په ورځ د افغاني تولیداتو په نندارتون کې د ګډون په موخه قزاقستان ته سفر کړی.
یاد نندراتون به نن یکشنبه د قزاقستان په الماتا ښار کې د څه باندې ۲۰۰ افغان سوداګرو په ګډون پرانیستل شي.