د ریاستالوزرا اقتصادي مرستیال ملا عبد الغني برادر اخوند د سالنګونو لویې لارې له کاري بهیر څخه لیدنه وکړه.
د دغه لیدنې پر مهال د ټولګټو وزارت وزیر ملا محمد عیسی ثاني او یوشمېر نورو مسولینو هم حضور درلود.
د ریاستالوزرا اقتصادي مرستیال د سالنګونو لویې لارې د بیارغونې له ترسره شوو کارونو خوښي څرګنده کړې او د یادې پروژې مسوولینو ته یې د دې ملي پروژې د کار د غوره کیفیت او په ټاکلي وخت د بشپړېدو په هکله اړینې لارښوونې کړې دي.
محترم ملا صاحب د قراردادي شرکتونو مسوولینو، تطبیق کوونکو ټیمونو او فني کارکوونکو سره د لیدنې پر مهال ویلي، چې د هېواد د ابادۍ لپاره باید په ګډه کار وکړو او دا د ویاړ ځای دی، چې تاسې یې په بیارغونه کې برخه اخلئ.
د سالنګونو لویې لارې د بیارغونې کار د ټولګټو وزارت تر نظارت لاندې له خصوصي سکټور سره په درېیو برخو کې قرارداد شوی، چې اوسمهال یې له تونل څخه تر ۱۶ مې ګالرۍ پورې د سي ټي بي او کانګرېټ اچونې کار بشپړ شوی او په شمالي او جنوبي سالنګ کې د ۱۰ ګالریو د بیارغونې کار جریان لري.
د یادونې وړ ده، چې د یادو ګالریو پر بیارغونې سربېره په شمالي سالنګ کې د خنجان-دوشي سړک د اسفالټ اچونې کار هم جریان لري.