الجزیرې خبري شبکې د غزې روغتیایي سرچینو له قوله ویلي؛ یوازې پرون(سېشنبه، د اکتوبر ۲۹) د اسرائیلي یرغلګرو د بریدونو له امله په غزه تړانګه کې ۱۴۳ فلسطینیان شهیدان شوي، چې ۱۳۲ یې یوازې د دې تړانګې په شمال کې دي.
په دې بریدونو کې تر ټولو خونړۍ د غزې په شمال بیتلاهیا ښار کې یو کور په نښه شوی، چې ۹۳ فلسطینیان پکې شهیدان شوي.
اسرائیلي یرغلګرو بیتلاهیا کې له دې برید وروسته یو ځل بیا هماغه ودانۍ، چې ژغورنکو ډلو د مخکیني برید له امله د ټپيانو د ژغورلو او د نادرکه کسانو د پلټنې چارې پر مخ وړې، په نښه کړې چې لږ تر لږه ۱۹ نور فلسطینیان پکې شهیدان شوي.
صهیونیستي یرغلګرو وړاندې پر یوه پینځه پوړیزه ودانۍ برید کړی و، چې ۹۳ فلسطینیان پکې شهیدان ، ګڼ نور ټپيان او ډېر نور تر خاورو او ویجاړیو لاندې وو. د غزې روغتیا وزارت وايي، چې په یادو شهیدانو کې ۲۵ ماشومان هم شامل دي.
د ملګرو ملتونو د بشري حقونو سازمان په یاد برید خواشیني څرګنده کړې او دا یې په تېرو درېیو میاشتو کې غزه کې یو له خونړیو بریدونو څخه ګڼلی دی.
د اسرائیلي یرغلګرو له لوري د شمالي غزې د پوځي محاصرې او بیتلاهیا کې د پراخه ځمکنیو او پوځو عملیاتو د زیاتولو ۲۶مه ورځ ده.
د فلسطیني ملکیانو د دفاع اداره وايي، چې شمالي غزه کې له ۱۰۰ زره زیات فلسطینیان خوړو او اوبو ته له لاسرسي پرته ایسار پاتې دي. دغهراز لسګونه نور د بمبار شویو ودانیو تر خاورو لاندې بند پاتې دي او ژغورنکې ډلې د صهیونیستي عسکرو د بریدونو او محاصرې له امله سیمې ته نهشي تلای.
عیني شاهدانو ویلي، چې اسرائیلو له خبرداري پرته برید وکړ.
د اسماعیل په نوم یوه عیني شاهد الجزیرې ته ویلي: “څرنګه چې تاسې وینئ، شاوخوا شهیدان پراته دي او جسدونه تر خاورو لاندې دي.”
یوې بلې فلسطینۍ مېرمنې هم ویلي، چې د کورنۍ ګڼ غړي یې له لاسه ورکړي.
نوموړي ویلي: “زما دواړه زامن له خپلو ټولو کورنیو سره شهیدان شوي. زما پېغله لور هم شهیده شوې.”
یادې فلسطینۍ مېرمنې په سلګیو زیاته کړې: “زما بله لور او پینځه ماشومان یې ټول شهیدان شوي. دوی کومه ګناه کړې وه؟ دې بېګناه انسانانو څه کړي و، چې داسې ووژل شول؟”
ژغورونکو ډلو ویلي، چې د دې برید د قربانیانو ډېری برخه ښځې او ماشومان دي.
د ۲۰۲۳ د اکتوبر له ۷مې راهیسې پر غزه د صهیونیستي یرغلګرو په بریدونو کې ۴۳ زره او ۶۱ فلسطینیان شهیدان او ۱۰۱ زره او ۲۲۳ نور ټپيان شوي دي.