د راپورونو له مخې، د اسپانیا په سويل ختیځ ویلېنسیا سیمه کې د راوتلو سېلابونو له امله لږ ترلږه ۹۵ کسان وژل شوي او سلګونه نور بېدرکه دي.
ویل کېږي، چې د وژل شویو دا شمېر وروستی نه دی او ښايي نور هم لوړ شي.
د ځایي چارواکو په وینا؛ د سختو بارانونو له کبله راوتلو سېلابونو یو شمېر سړکونه او ښارګوټي لاندې کړي، پلونه یې نړولي او موټرونه یې لاندې کړي دي. دغهراز ټولې لارې او سړکونه تړل شوي دي.
د راپورونو له مخې، ویلېنسیا ته نږدې په چیوا ښارګوټي کې په اتو ساعتونو کې د یوه کال په اندازه باران ورېدلی.
ځايي چارواکو ویلي، چې د ژغورنې عملیاتو کې د مرستې په موخه له ۱۰۰۰ ډېر سرتېري ګومارل شوي دي.
د اسپانیا چارواکو د سېلابونو په راوتلو سخته خواشیني ښودلې او د قربانیانو له کورنیو سره یې خواخوږي ښودلې ده.