د ریاست الوزرا اداري مرستیال مولوي عبدالسلام حنفي پرون (د تلې نهمه، سه شنبې په ورځ) د حضرت حمزه رضی الله تعالی عنه ښوونیز مرکز څخه د کابل امنیه قومندانۍ له ۴۰۰ زیاتو ځواکونو د فراغت مراسمو کې ګډون او وینا کړې.
په دې اړه جوړو شویو مراسمو کې مولوي عبدالسلام حنفي په خپله وینا کې ټولو هغو کسانو ته چې له یوې روزنیزې دورې وروسته له حضرت حمزه رضی الله تعالی عنه ښوونیز مرکز څخه فارغ شوي، مبارکي ویلې او له هغوی یې غوښتي، چې له خپلو زده کړو څخه د خلکو د هوساینې او ارامي په ټینګښت کې ښه ګټه واخلي.
مولوي عبدالسلام حنفي ویلي؛ زموږ ګران هېواد د نیمې پېړۍ جګړه کې سخت ویجاړ شوی، افغانانو زیاتې ستونزې زغملې او اوس د دې وخت را رسېدلی، چې خلکو سره ښه چلند وشي، ترڅو هغوی په امنیت او ارامي کې ژوند وکړي.
نوموړي زیاته کړې؛ د اسلامي امارت ټول ځواکونه د خپلو دندو په ترسره کولو کې باید له تقوا کار واخلي او د خپل اسلامي نظام، بیت المال، هېواد او ملت د ساتلو کوښښونه وکړي.
دغهراز مولوي عبدالسلام حنفي د اسلامي امارت له ټولو مسولینو او ځواکونو څخه غوښتي، چې د اسلامي امارت د فرامینو او لارښوونو په اطاعت کې نافرماني ونه کړي او له خلکو سره نېک چلند وکړي.