د رياست الوزرا اداري مرستيال مولوي عبدالسلام حنفي د بلخ مرستيال والي مولوي نورالهادي ابو ادريس سره لیدنه کړې.
په دې لیدنه کې لومړی د بلخ مرستيال والي نورالهادي ابو ادريس د عمومي وضعيت، حکومتولۍ او د بلخ د محلي ادارې د کړنو په اړه راپور ورکړ.
نوموړي ویلي؛ په دې ولايت کې امنيت په بشپړ ډول ټینګ شوی دی، مجاهدين او محلي مسولین خلکو ته د خدمت رسونې لپاره هڅې کوي او د اسلامي امارت د مقاماتو او مشرانو د فرامينو او لارښوونو د پلي کېدو لپاره تيار دي.
د رياست الوزرا اداري مرستيال مولوي عبدالسلام حنفي په دې لیدنې د خوښۍ څرګندولو ترڅنګ د بلخ ولايت د مسولینو فعاليتونه او کړنې ستایلي دي او ویلي يي دي؛ د ثبات او ارامۍ ټینګښت، د ټولنيزې هوساينې برابرول او د خلکو غوښتنو ته رسېدنه د اسلامي امارت له مسولیتونو څخه دي.
نوموړي زیاته کړې، مجاهدين او مسولین بايد په نيک چلند خپلې اړوندې چارې ترسره کړي او خلکو ته د خدمت لپاره بايد لا زياتې هڅې وکړي.