د عامې روغتیا وزیر مولوي نور جلال جلالي د هېواد ۳۴ ولایتونو د عامې روغتیا له رییسانو سره د ولسوالیو د کچې روغتیايي مرکزونو جوړېدو لپاره د طرحې اړوند انلاین لیدنه کړې.
په دې لیدنه کې چې د عامې روغتیا وزارت د خوړو او درملو مرستیال مولوي حمدالله زاهد هم شتون درلود، د عامې روغتیا وزیر مولوي نور جلال جلالي ولایتي مسولینو ته د هغه ولسوالیو، چې د ولسوالۍ کچې روغتیايي مرکزونه نه لري، په دغه ولسوالیو کې د سیمو د تثبیت او لومړنیو چارو ترسره کولو اړوند لازمې لارښوونې ترسره کړې؛ ترڅو هېوادوالو ته د روغتیايي خدمتونو رسولو برخه کې لا زیاتې اسانتیاوې رامنځته او په سمه توګه د ولسوالیو د کچې روغتیايي مرکزونو د جوړېدو چارې پر مخ لاړې شي.
ولایتي رییسانو د عامې روغتیا وزارت رهبرۍ ته د ولسوالۍ کچې روغتیايي مرکزونو د جوړېدو لپاره د سیمو د تثبیت او په دې برخه کې په غوره توګه د لومړنیو چارو پر مخ وړلو ډاډ ورکړی او هم یې په دې برخه کې شته پوښتنې شریکې کړې، چې د تخنیکي ټیم له لوري ورته معلومات ورکړل شوي دي.