یو شمېر رسنیو د امریکا د مرکزي قومنداني یا سنټکام له قوله خبر ورکړی، چې د دغه هېواد بي-۵۲ الوتکې منځني ختیځ کې د امریکا تر کنټرول لاندې سیمې ته رسېدلې دي.
پنټاګون تېره جمعه اعلان وکړ، چې د امریکا دفاع وزارت په منځني ختیځ کې د نظامي هډو پیاوړي کولو په موخه سیمې ته د دې بم غورځوونکو الوتکو د استولو امر کړی دی.
د پنټاګون ویاند پاټریک رایډر ویلي، چې د امریکا دفاع وزیر لویډ اسټین په منځني ختیځ کې د امریکايي وګړو او ځواکونو د دفاع، د اسرائیلو د دفاع او د تاوتریخوالي د کمولو لپاره سیمې ته د پوځي مهماتو د استولو امر کړی دی.
امریکا د ۲۰۲۳ کال له اکتوبر راهیسې په منځني ختیځ کې دوې الوتکې وړونکې بېړۍ ځای پر ځای کړې دي.