د ریاستالوزرا اقتصادي مرستیال ملا عبدالغني برادر اخوند په خپل کاري دفتر کې د هند او بنګهدېش هېوادونو له یو شمېر علماوو سره لیدنه کړې.
د دې لیدنې پر مهال د ریاستالوزرا اقتصادي مرستیال ملا عبدالغني برادر اخوند ویلي؛ اسلامي امارت تل هڅه کړې چې د اسلام مبارک دین له ټولو خرافاتو څخه پاک او په صحیح شکل خپل ولس ته ورسوي، چې په همدې موخه یې مدارس تقویه کړي، د نویو علمي اداراتو پر رامنځته کولو یې کار کړی او په ښوونیز نصاب کې یې د پام وړ اصلاحات راوستلي دي.
نوموړي زیاته کړې؛ اسلامي امارت د دې ترڅنګ د خپل هېواد د اقتصادي وضعیت د ښه کولو په موخه هم موثرې هڅې پيل کړې دي، لویې اقتصادي پروژې پيل شوې، له ګاونډیو، سیمې او نړۍ هېوادونو سره سوداګري پراخه شوې، د صنعت په سکټور کې د پخوا په پرتله پرمختګ شوی او پر ځان متکي او له بهرنیو غوښتنو څخه خلاص اقتصاد ته یې زمینه برابره کړې ده.
د ملا عبدالغني برادر اخوند په وینا؛ د افغانستان د ملي شتمنۍ کنګل کېدل او اقتصادي بندیزونه هغه ستونزې دي، چې د افغانستان اقتصادي وده یې ټکنۍ کړې ده.
اقتصادي مرستیال ویلي، اسلامي امارت له نړۍ سره د اسلامي شریعت په رڼا کې د متقابلو ګټو پر بنسټ د ولاړو سیاسي او اقتصادي اړیکو غوښتنه کوي او پر خپلو پښو ولاړ افغانستان د سیمې او نړۍ په ګټه بولي.
دغهراز د یادو هېوادونو علماوو په افغانستان کې د اسلامي نظام په حاکمیت سره خوښي څرګنده کړې او د اسلامي نظام د تقویې په موخه یې خپل نظرونه شریک کړي دي.