د لوړو زده کړو وزیر شيخ نداء محمد نديم زابل ولایت ته د خپل رسمي سفر په ترڅ کې د ميرويس خان نيکه د لوړو زده کړو په موسسه کې د دې ولايت د والي مولوي حزب الله افغان، مرستيال والي مولوي محب الله حماس، د زيات شمير امارتي ادارو مسولینو او د يادې موسسې محصلانو سره په يوه جوړه شوې غونډه کې ګډون کړی.
په پیل کې د ميرويس خان نيکه د لوړو زده کړو موسسې رییس روح الله مشال د لوړو زده کړو وزیر او غونډې ته د یادې موسسې د لاسته راوړنو، فعالیتونو او ستونزو په اړه معلومات وړاندي کړي.
نوموړي ویلي؛ لا هڅې کوي، چې د رهبرۍ په مرسته دغه لاسته راوړنې لا زياتې او ستونزو ته پر وخت رسېدنه وکړي.
په غونډه کې د زابل مرستيال والي مولوي محب الله حماس او د علماوو شورا رییس مولوي عزيزالله طيب ویلي؛ افغانان ديني او عصري علم ته اړتیا لري، ځکه موږ له نورو هېوادونو څخه د ټکنالوژۍ په برخه کې لسګونه کلونه شاه ته پاتي يوو، اوس کولي شو چې د نورو سره د ديني او عصري زده کړو له لارې ځان سيال کړو.
د لوړو زده کړو وزیر شيخ نداء محمد نديم د يادې موسسې فعالیتونه او لاسته راوړنې ستایلي او د شته ستونزو د حل ډاډ یې ورکړی.
نوموړي د علم، پوهنتونونو او مدارسو پر ارزښت خبرې وکړې او زیاته کړې یې ده، چې د علم په واسطه د انسان اخرت او دنيا دواړه جوړيږي، د ښو کول او د بدو څخه منع کول هم د علم په ذريعه سره کيږي.
د لوړو زده کړو وزیر ویلي؛ محصلين د نظام لپاره ډير اړين او مهم دي، دا نظام په سلګونو ميليونو پيسې يوازي د کابل پر پوهنتون لګوي او دا پيسې زما شخصي نه دي، دا د دې ولس پيسې دي، خو دا ولس د نظام څخه ښه ډاکتر، انجينر، معلم او نور مسلکي کسان غواړي.
ښاغلي ندیم له محصلينو غوښتي، چې تاسو په خپلو کارونو او پلانونو نظر وکړئ، که دلته کوښښ وکړي او کله چې فارغ شي، نو هره اداره کې به درته دنده بې تکليفه پيدا کيږي او که هڅه ونه کړي، نو ادارې وړتيا او کار غواړي، که وړتيا نه وي، نو کار نه درکول کيږي.
همدارنګه شيخ نداء محمد نديم له محصلينو غوښتي؛ که غواړئ، چې ښه مسلکي کس شي او نيت مو دا وي چې د ټولنې خدمت وکړم، نو پخپل مقصد کې بريالي کيږئ، د ښه مسلکيتوب ترڅنګ زموږ ستاسو ښې عقيدې په کار دي، د خلکو په درغجنو شعارونو مه غوليږئ، د هيڅ سياسي حرکت په شعارونو خطا نشئ، خپل مبارک دين، عقيدې او مسلک ته پاملرنه ولرئ
د لوړو زده کړو وزير له استادانو غوښتي، چې د محصلينو روزنې ته لا زياته پاملرنه وکړي، دا زموږ د ټولو لوی مسولیت دی.