ملګري ملتونه وايي، چې غزه تړانګه د زرګونه ماشومانو په هدیره بدله شوې ده.
الجزیره د فلسطین د روغتیايي چارواکو له قوله وايي، چې غزه کې د ۲۰۲۳ د اکتوبر له ۷مې راهیسې د اسرائیلي یرغلګرو په بریدونو کې ۱۷ زره او ۴۰۰ فلسطیني ماشومان شهیدان شوي دي.
له دې ښکاري، چې په هرو ۳۰ دقیقو کې یوه ماشوم ژوند بایللی.
پر دې سربېره زرګونه نور تر ویجاړیو لاندې او ورک دي.
غزه تړانګه کې ژوندي ماشومان هم د اوږدې او پرلهپسې جګړې له امله سختې ناخوالي زغمي او خپل ژوند د اسرائیلي یرغلګرو د بمباریو، کلابندۍ او د سختې لوږې په سیوري کې تېروي.
- غزه کې په مستند ډول ثبت شوي شهید ماشومان په لاندې ډول دي:
- – ۷۱۰ له یوه کاله کمعمره ماشومان
- – ۱۷۹۳ کوچنیان (۱-۳ کلونو عمر لرونکي)
- – ۱۲۰۵ د ښوونځي دورې ته د چمتووالي ماشومان (۴-۵ کلونو عمر لرونکي)
- – ۴ زره او ۲۰۵ د لومړني ښوونځي ماشومان (۶-۱۲ عمر لرونکي)
- – ۳ زره او ۴۴۲ د لیسې دورې ماشومان (۱۳-۱۷ عمر لرونکي)
د دې تر څنګ یونیسف وړاندې ویلي وو، چې له ۱۷ زره ډېرو ماشومانو مور او پلار او یا یو له دوی نه په جګړه کې بایللي دي.
په نړیواله کچه د ماشومانو د دفاع مسولینو ویلي، چې موږ غزه کې په ريښتیا هم د نسلوژنې شاهدان یو.
د ماشومانو د خوندیتوب ادارې (Save the Children) په وینا؛ هره ورځ ۱۰ ماشومان یوه یا دوې پښې بایلي. د اسرائیلو د کلابندۍ له امله د دوی عملیات او یا د کوم غړي د پرې کولو پروسه د بېهوښۍ له درملو پرته ترسره کېږي.
د یونسف د راپور له مخې، پاکو اوبو ته د نهلاسرسي له امله به د غزې ګڼ نور ماشومان د محرومیت او ناروغیو له امله مړه شي.