د احصایې او معلوماتو ملي ادارې د نفوسو د احوال ثبتولو مرستیال مولوي محمدنبي محمدي او ورسره پلاوي په ایران کې د افغانستان اسلامي امارت له سفیر مولوي فضل محمد حقاني سره لیدنه کړې.
په دې لیدنه کې مولوي فضل محمد حقاني په یاد هېواد کې د افغان کډوالو د هویت د تثبیت د چارو د ښه تنظیم، د هویتي ستونزو د حل په موخه د الکترونیکي پیژندپاڼو د وېش څانګو د جوړولو او افغان محصلینو ته د تابعیت پیژندپاڼو د وېش په بهیر کې د اسانتیاوو د رامنځته کولو غوښتنې کړې دي.
ورپسې د احصایې او معلوماتو ملي ادارې د نفوسو د احوال ثبتولو مرستیال مولوي محمدنبي محمدي په ایران کې د افغان کډوالو د هویتي ستونزو د حل، په یاد هېواد کې د الکترونیکي پیژندپاڼو د وېش څانګې د جوړولو او افغان محصلینو ته د لازمو اسانتیاوو د رامنځته کولو ژمنې کړې دي.
د احصایې او معلوماتو ملي اداره د هېواد دننه او بهر د افغانانو د هویت د تثبیت او د نفوسو د احوال ثبتولو د معتبرې مرجع په توګه ژمنه ده، چې ټولو هېوادوالو ته اړوند خدمتونه وړاندې کړي، چې پر همدې بنسټ څه موده وړاندې په متحده عربي اماراتو کې افغان کډوالو ته د اسانتیا په موخه د اسان خدمت مرکز پرانیستل شوی.