د ارشاد، حج او اوقافو وزیر شیخ نور محمد ثاقب په مالیزیا هېواد کې د افغانستان له سفیر مولوي نقیب الله احمدي سره د خپل کار په دفتر کې لیدنه کړې.
په دې لیدنه کې د ارشاد، حج او اوقافو وزیر د افغانستان او مالیزیا ترمنځ د اسلامي ارزښتونو پر بنسټ د دوستانه اړیکو د اړتیا یادونه کړې او ویلي يي دي؛ افغانستان او مالیزیا د اسلامي نړۍ دوه مهم هېوادونه دي چې ګډ اسلامي، دیني او کلتوری مشترکات لري.
نوموړي زیاته کړې، د افغانستان اسلامي امارت د سرتاسری امنیت د ټینګښت ترڅنګ د خپلو خلکو د خدمت لپاره رښتیني ګامونه پورته کړي او له ټولو هېوادونو په ځانګړي ډول له اسلامي هېوادونو سره د ښو او دوستانه ډیپلوماتیکو اړیکو غوښتنه کوي.
ورپسې په مالیزیا کې د افغانستان داسلامي امارت سفیر په خپلو خبرو کې د افغان سفارت د لاسته راوړنو او پرمختګونو په تړاو د ارشاد، حج او اوقافو وزیر ته معلومات ورکړي او ویلي يي دي؛ د افغانستان سفارت په کوربه هېواد مالیزیا کې د افغان محصلینو، کډوالو او سوداګرو ستونزې حل کړي او ورسره په دوامداره توګه لیدنې ترسره کوي.
مولوي نقیب الله احمدي زیاته کړې؛ د مالیزیا حکومت له افغانستان سره د دوه اړخیزو اړیکو د پیاوړتیا، په ځانګړي ډول دیني، کلتوري او ټولنیزو همکاریو ته لیواله دی.
د لیدنې په پای کې د ارشاد، حج او اوقافو وزیر په ماليزيا کې د افغانستان سفیر ته د خپلو سپارښتنو په لړ کې ویلي، په مالیزیا هېواد کې د مېشتوافغانانو ستونزو ته په وخت رسېدنه وکړئ او سفارت دې په یاد هېواد کې د افغانستان ښه استازولي ترسره کړي .