د چاپېریال ساتنې ملي ادارې پالیسي او مسلکي مرستیال ډاکټر زین العابدین عابد تېره ورځ (چهارشنبه د ۱۴۰۳کال د لړم په ۳۰مه نېټه) په خپل کاري دفتر کې د کانونو او صنایعو خونې له رییس شیرباز کمین زاده او د هلمند ولایت له یو شمېر صنعت کارانو سره لیدنه کړې.
دې لیدنه کې په هلمند ولایت کې د صنعت کارانو د شته ستونزو او حل لارو په هکله هر اړخیزې خبرې شوې دي.
د چاپېریال ساتنې ملي ادارې پالیسي او مسلکي مرستیال ډاکټر زین العابدین عابد صنعتکارانو سره د هر ډول همکارۍ ژمنه کړې او سپارښتنه یې ورته کړې، چې د هېوادوالو روغتیا ساتنې او د هواککړتیا د مخنیوي لپاره باید لازم تدابیر ونیسي.
ښاغلي عابد ویلي؛ اوس د چاپېریالي جوازونو د وېش بهیر ساده شوی او کوښښ کوو، چې د پانګوالو د هڅونې لپاره هر ډول فعالیتونو ته جوازونه ورکړو.
نوموړي زیاته کړې؛ موږ ټول باید د هېواد په ابادۍ کې ونډه واخلو او له صنعتکارانو مو غوښتنه دا ده، چې باید چاپېریالي اصولو ته پاملرنه وکړي.
په دې لیدنه کې د هلمند ولایت څو تنو صنعتکارانو د خپلو ستونزو په تړاو خبرې کړي او ژمنه یې کړې، چې خپل فعالیتونه به د چاپېریالي اصولو اړوند عیاروي او د هوا ککړتیا د مخنیوي په برخه کې به لازم اقدامات کوي.