رياست الوزرا سياسي مرستيال مولوي عبدالكبير غزني ولایت ته د سفر په لړ کې له یو شمېر ځوانانو، فرهنګپالو او لیکوالانو سره لیدنه وکړه.
په لیدنه کې د غزني ولایت والي حافظ محمد امین عمري هم شتون درلود.
د غزني ولایت لیکوالانو او د رسنیو فعالینو د اسلامي امارت تر سیوري لاندې د ځوان نسل د افکارو جوړولو او د نظام د ټینګښت لپاره د ځوانانو د فعالیتونو پر دوام ټینګار وکړ او په یاد ولایت کې یې د قرائت د تخصصي مرکز جوړولو لپاره د همکاریو غوښتنه وکړه.
دغو لیکوالانو او د رسنيو فعالينو د اسلامي امارت په ملاتړ د کلتوري چارو د پیاوړتیا ترڅنګ وویل، ځوانان د حکومت د ملاتړ او ستاینې مننه کوي.
همداراز حاضرو لیکوالانو په غزني کې د ځوانانو یو شمېر وړاندیزونه او مشورې هم له سیاسي مرستیال او د غزني والي سره شریکې کړې.
مولوي عبدالکبیر د اسلامي امارت د مبارزې په لړ کې کلتوري فعالیتونه او هڅې خورا مهمې بللي او ويي ویل؛ هماغسې چې د اسلامي امارت په بریا کې ځوانانو لویه ونډه درلوده، اوس د اسلامي امارت په لیکو کې هم پراخ شتون او ګډون لري.
سیاسي مرستیال د خپلو خبرو په پای کې وویل؛ اسلامي امارت په درېیو کلونو کې په ټولو برخو کې ښه پرمختګونه کړي او ځوانان باید ډاډه اوسي، چې حکومت د هغوی د غوره راتلونکې لپاره هڅې کوي.