د اقلیمي بدلون نړیوال کنفرانس (COP29) په لړ کې د اسلامي امارت پلاوي چې د چاپېریال ساتنې ملي ادارې عمومي رییس مولوي مطیع الحق خالص په مشرۍ یې هلته ګډون کړی، د لړم په ۳۰مه نېټه د نړیوالو چاپېریالي اسانتیاوو (GEF) سکرتریت له مسولینو سره ولیدل او پر افغانستان یې د اقلیمي بدلون د ناوړه اغېزو په تړاو خبرې وکړې.
د ليدنې په پیل کې د چاپېریال ساتنې ملي ادارې عمومي رییس مولوي مطیع الحق خالص د اقلیمي بدلون د ناوړه اغېزو څخه د افغانستان د اوبو او کرنې سکتور او همدا راز د خلکو د زیانمن کېدو په هکله د (GEF) سکرتریت مسولینو ته معلومات ورکړل او د (focal point) د منلو او د روابطو د ادامې له امله یې ترې مننه وکړه.
د لیدنې په لړ کې د افغانستان د وړاندیز شوو او د جریان په حال کې چاپېریالي پروژو په هکله خبرې وشوې او د (GEF) سکرتریت له مسولینو غوښتنه وشوه، چې د افغانستان وړانديز شوې چاپېریالي پروژې تاید کړي.
په پای کې دواړو لورو د همکارۍ پر دوام او پراختیا ټینګار وکړ.
د یادونې وړ ده، چې د روان زیږدیز کال د ډسمبر په میاشت کې به د نړیوالو چاپېریالي اسانتیاوو له لوري عالي شورا جوړه شي چې پکې به د یاد صندوق لخوا د تمویلیدونکو څو پروژو په تړاو بحث او پريکړه وشي.