د باغدرې بند د امکان سنجي، جیوفزیک او جیوتخنیک د مطالعاتو په موخه د اوبو او انرژي وزارت او مس عینک قراردادي شرکت(ام.سي.سي – جه.سي.ال) ترمنځ هوکړه لیک لاسلیک شو.
دغه هوکړه لیک نن د ۱۴۰۳هـ ش کال د لیندۍ د میاشتې په ۱۱ نېټه د اوبو او انرژي وزیر ملا عبداللطیف منصور او د لوګر د مس عینک قراردادي شرکت (ام.سي.سي – جه.سي.ال) د ریيس سونګ ون بینګ ترمنځ لاسلیک شوه.
په دې غونډه کې افغانستان کې د چین سفیر ژو ژینګ، د کانونو او پټرولیم مرستیال شیخ ضیاء الرحمن او د اوبو او انرژي وزرات ګڼ شمېر ریيسانو ګډون درلود.
د اوبو او انرژي وزیر د دغه هوکړه لیک د لاسلیکولو په غونډه کې د لوګر ولایت د مس عینک پروژې د اړتیا وړ برېښنا د چمتوکولو په برخه کې د باغدرې بند د ارزښت یادونه کړې او ټینګار یې کړی، چې د باغدرې بند د پروژې پلي کول به د افغانستان او چین ترمنځ د ګډو همکاریو په برخه کې یوه ارزښتناکه لاسته راوړنه وي.
ښاغلي منصور د چین او افغانستان ترمنځ د همکاریو پر پراختیا ټینګار کړی او د چین سفیر او د ام. سي. سي شرکت مسولینو ته یې ډاډ ورکړی، چې اوسمهال په افغانستان کې له هره پلوه د پانګونې لپاره زمینه چمتو ده او اسلامي امارت په دې برخه کې هر ډول همکاري ته ژمن دی.
د کانونو او پټرولیم وزارت مرستیال شیخ ضیاالرحمن په دې غونډه کې یادونه کړې، چې افغانستان د کانونو له پلوه بډای دی او له نیکه مرغه اوسمهال اسلامي امارت دغه زمینه چمتو کړې، چې د هېواد له کانونو څخه د هغه د آبادۍ او پراختیا په لاره کې ګټه پورته شي.
د دې غونډې په دوام د چین هېواد سفیر او د ام. سي.سي شرکت رئيس هر یوه په خپل وار سره د افغانستان او چین ترمنځ د ښو اړیکو ستاینه کړې او د دغه هوکړهلیک لاسلیکول یې د دواړو هېوادونو ترمنځ د همکاریو د دوام په برخه کې یو مثبت ګام بللی دی.
د یادونې وړده، چې له دغه هوکړه لیک سره سم یاد شرکت د ۸ میاشتو په موده کې د امکان سنجي، جیوفزیک او جیو تخنیک مطالعات سرته رسوي او د اوبو او انرژي وزارت به هم د هوکړه لیک له شرایطو سره سم له دې شرکت سره همکاري وکړي.