د الجزیرې د راپور له مخې، غزه کې د اسرائیلي یرغلګرو په وروستیو بریدونو کې یوازې پرون جمعه لږ تر لږه ۶۳ فلسطینیان شهیدان او ګڼ نور ټپيان شوي دي.
په دې بریدونو کې د مرکزي غزې په نصیرات کمپ کې یو کور هم په نښه شوی، چې د شپږو ماشومانو او پینځو ښځو په ګډون لږ تر لږه ۲۱ فلسطینیان پکې شهیدان شوي.
پر دې سربېره د ملکي دفاع ادارې د راپور له مخې، د غزې په شمال کې، چې له اوږدې مودې راهیسې کلابند دی، د کمال عدوان روغتون شاوخوا بریدونه شوي، چې لږ تر لږه ۲۹ فلسطینیان پکې شهیدان شوي دي.
د الجزیرې خبریال هم راپور ورکړی، چې د اسرائیلي یرغلګرو ټانکونه او ډرون د کمال عدوان روغتون شاوخوا عملیات کوي او په روغتون کې د ننه او بېرون خوځېدونکي په نښه کوي.
د یاد روغتون د نرسانو مشر ډاکټر عید صباح الجزیرې ته ویلي، چې پرون سهار د اسرائیلو ټانکونه د روغتون په ۵۰ متري کې ځای پر ځای شول او د روغتون مشر ډاکټر حسام ابو صفیه او ملګرو ته یې پیغام ورکړ، تر څو د ناروغانو، ټپیانو او روغتیايي کارکوونکو په شمول روغتون تخلیه کړي.
د ښاغلي صباح په وینا؛ له دې غوښتنې لږ وروسته بریدونه پيل شول، چې د ۴ روغتیايي کارکوونکو په شمول ۳۰ کسان پکې شهیدان شول.
د دې تر څنګ د حماس غورځنګ مشرانو ویلي، چې نړیوالو منځګړو غزه کې له ښکېلو اړخونو سره یو ځل بیا د اوربند خبرې پیل کړې دي، خو د نتانیاهو دولت تر اوسه د پلاوي له لېږلو سره هوکړه نه ده کړې.
د ۲۰۲۳ د اکتوبر له ۷مې راهیسې غزه کې د اسرائیلي یرغلګرو د نسلوژنې په جګړه کې لږ تر لږه ۴۴ زره او ۶۱۲ فلسطینیان شهیدان او ۱۰۵ زره او ۸۳۴ نور ټپیان شوي دي.