د ریاست الوزرا سیاسي معاونیت د دفتر عمومي رییس مولوي ذاکر الله ذاکر په سپېدار ماڼۍ کې د تېرې ادارې د ولسي جرګې له یو شمېر وکیلانو سره لیدنه کړې.
په دې لیدنه کې د تېرې ادارې پر مهال د افغانستان له بېلا بېلو ولایتونو څخه د پارلمان غړو ویلي، د پارلمان ډېر شمېر وکیلان په افغانستان کې مېشت دي او په ډاډه زړه ژوند کوي.
هغوی افغانستان خپل کور او اسلامي امارت خپل نظام یاد کړی او زیاته کړې یې ده، وکیلان بهر ته د تګ او د هېواد د پرېښودلو اراده نه لري.
همدارنګه دوي، د ریاست الوزرا سیاسي معاونیت د دفتر عمومي رییس سره د وکیلانو یو شمېر ستونزې، مشورې او وړاندیزونه هم شریک کړي دي.
د ریاست الوزرا سیاسي معاونیت د دفتر عمومي رییس مولوي ذاکرالله ذاکر د تېرې ادارې د پارلمان غړو ته د هرکلي ترڅنګ ویلي، افغانستان د ټولو افغانانو ګډ کور دی او هیڅوک دې پکې د پردیتوب احساس نه کوي.
نوموړي زیاته کړې؛ د اسلامي امارت مشران او مسولین د هېواد د ابادۍ، پرمختګ او ځان بساینې لپاره هڅې کوي او اړتیا ده، چې ټول افغانان د هېواد د ابادۍ له کاروان سره یو ځای شي.
دغهراز ښاغلي ذاکر ډاډ ورکړی، چې د پارلمان د غړو ستونزو ته به رسیدنه وشي.