د الجزیرې د راپور له مخې، اسرائیلي رژیم ویلي، چې په تېرو ۴۸ ساعتونو کې یې په سوریه کې شاوخوا ۴۸۰ بریدونه کړي او په بېلابېلو سیمو کې یې ۱۵ سمندري جنګي بېړۍ، د مهماتو زېرمې، توغندي، بېپیلوټه الوتکې، د الوتکو ضد وسایل او وسلې له منځه وړي دي.
سوریه کې د بشار الاسد د رژیم له سقوط وروسته اسرائیلي یرغلګرو د سوریې پر بېلابېلو سیمو هوايي بریدونه پيل کړي او خپل عسکر یې له ۵۰ کلونو وروسته په لومړي ځل له سوریې سره په حایله سرحدي سیمه او نورو مهمو برخو کې ځای پر ځای کړي دي.
دا حایله سیمه د سوریې د قلمرو په قنیطره برخه کې موقعیت لري، چې په ۱۹۷۴ کې د اسرائیلو او سوریې تر منځ د یوې هوکړې پر اساس رامنځته شوې وه.
اسرائیلي پوځ ویلي، چې په دې ۴۸۰ بریدونو کې یې د سوریې په بېلابېلو ښارونو کې ګڼ مهمات او وسلې له منځه وړي دي.
دوی زیاته کړې؛ جنګي بېړیو یې د سوریې دوه سمندري تاسیسات، چې ۱۵ بېړۍ پکې ولاړې وې، په نښه کړي او لسګونه سمندري توغندي یې له منځه وړي دي.
د اسرائیلي رژیم دفاع وزیر اسرائیل کاتز په سمندري تاسیساتو برید “لوی بری” بللی او ویلي یې دي، چې دا یې اسرائیلو ته د ګواښونو له منځه وړلو د ماموریت یوه برخه وه.
نوموړي زیاته کړې، چې د سوریې په سویل کې به هم یوه دفاعي سیمه جوړوي.
د فرانسې خبري اژانس له لوري په خپرو شویو انځورونو کې ښکاري، چې په لتاکیا کې د سوریې سمندري بندر کې ګڼې ویجاړۍ رامنځته شوې او د دمشق په سویل لوېدیځ المزه پوځي اډه کې جنګي الوتکې زیانمنې شوې دي.
د افغانستان اسلامي امارت او ګڼو عربي هېوادونو په سوریه کې د اسرائیلي یرغلګرو بریدونه غندلي او د دې هېواد د ازادۍ او استقلال څرگند نقض یې بللی دي.
عربي هېوادونو ویلي، چې اسرائیل د سوریې په جنوب کې غیرې نظامي سیمې ته په ننوتو سره د دې هېواد ځمکنۍ بشپړتیا او ملي حاکمیت تر پښو لاندې کوي.
د افغانستان اسلامي امارت د بهرنیو چارو وزارت د سوریې د خلکو په اراده له خپلواک حکومت څخه د ملاتړ تر څنګ په ښکېلو سيمهیيزو او نړيوالو قدرتونو غږ کړی، چې د سوریې ملت د خپل راتلونکي په باب خپل مستقل او ازاد انتخاب ته پرېږدي، تر څو له هر ډول بهرنیو فرمایشونو او فشارونو پرته د خپل هېواد برخلیک پخپله وټاکي.
ملګرو ملتونو هم له اسرائيلو غوښتي، چې په سوریه کې دې په نظامي مرکزونو بمبارۍ ودروي.