د ریاست الوزرا سیاسي مرستیال مولوي عبدالکبیر د ترکيې هېواد د خیریه بنسټونو له څو تنو استازو سره لیدنه کړې.
په دې لیدنه کې د خیریه بنسټونو استازو ویلي، د ترکیې حکومت او وګړي له افغانانو سره همکارۍ او په بېلابېلو برخو کې مرستو ته لېواله دي.
هغوی زیاته کړې؛ د ښوونیزو بنسټونو، جوماتونو رغولو، د پاکو اوبو رسولو او د بېوزله افغانانو د لاسنیوي په برخو کې د پروژو پلې کولو ته چمتو دي.
یادو استازو څرګنده کړې؛ په افغانستان کې د امن په راتګ سره د کار او پانګونې ښې زمینې برابرې شوې، باید ګته ترې واخیستل شي.
د ریاست الوزرا سیاسي مرستیال د ترکيې خیریه بنسټونو استازو ته د ښه راغلاست پر مهال د کابل او انقرې اړیکې ګټورې او مهمې ګڼلي او ترکیه یې د افغانستان دوست هېواد بللی دی.
مولوي عبدالکبیر له افغانانو سره د ترکانو د مرستو ستاینه کړې او ویلي يي دي، اسلامي امارت به په افغانستان کې له ترکي خیریه بنسټونو سره په هره کچه چې اړتیا وي مرسته وکړي، څو په اغېزناکه توګه خپلې چارې ترسره کړي.