د لوړو زده کړو وزارت وايي؛ د هېواد تحصیلي نهادونو د ښوونې او روزنې برخې د رياضي، فزيک، کيميا او بيولوژي څانګو د تحصيلي نصاب د بيا کتني او پراختيا دویم پړاو کلسټر پيل شو.
د کلسټر په پرانیسته کې د لوړو زده کړو وزارت د تحصیلي نصاب رییس مفتي عبدالروف فراهي د یاد کلسټر په اړه معلومات ورکړل.
نوموړي ریاضي، فزیک، کیمیا او بیالوژي د ټولو ساینسي او تجربي علومو لپاره اساس بللی او زیاته کړې یې ده، چې د ساینس او تجربي علومو برخه کې د نړۍ اوسني پرمتختګونو کې د مسلمان عالمانو رول له یونانیانو او غربيانو په پرتله زیات او بنسټیز دی او دا خبره خپله غربیان هم مني.
ښاغلي فراهي د کلسټر له ګډونوالو غوښتي، چې په نصابونو کې نړیوال معیارونه، ملي او دیني ارزښتونه او د ټولنې غوښتنې په پام کې ونیسي.
همدارنګه د تحصیلي نصاب د ملي کمېسیون غړي پوهنوال داود شاه فاروق د کلسټر د کار بڼه تشریح کړې او ویلي يي دي؛ د دې کلسټر د پینځو کاري ورځو په موده کې به د ښوونې او رزونې پوهنځيو استادان، ملي کمېسیون غړي او اړوندو ادارو مسلکي استازي پر نصاب کار وکړي.