د المپيک بدني روزنې او ورزش عمومي رياست اړوند د اس ځغلونې ملي فدراسيون له لوري د هرات ولايت د بدني روزنې او ورزش رياست په همکارۍ او کوربتوب د ۱۱ ولايتونو د اس ځغلونکو ترمنځ د اس ځغلونې اووم پړاو ملي ټاکنيزې سيالۍ پيل شوې.
د دغو سياليو د پيل په مراسمو کې د المپيک بدني روزنې او ورزش عمومي رييس مولوي احمد الله وثيق، د ياد رياست فني او مسلکي مرستیال حافظ احمد جان ځدران، د المپیکي چارو رییس داد محمد پاینده اختري، د یاد رياست ورزشي مشاور قاري حيات الله رحماني، د همدې رياست ارشد مشاور ګلاب الدين خپلواک او ورسره پلاوي، د يادو سياليو لپاره له مرکزي ادارې تللي هیت، د هرات ولايت د بدني روزنې او ورزش رييس محمد فايق فاضل، د آس ځغلونې ملي فدراسيون مسولينو، همدې ولايت امنيتي مسولينو، د رسنيو استازو، ورزشکارانو او د ياد ورزش زرګونو مينهوالو ګډون کړی و.
د دغو سياليو په پيل کې د هرات ولايت د بدني روزنې او ورزش رییس محمد فايق فاضل ګډونوالو ته ښه راغلاست ووايه او په دغه ولايت کې يې د اس ځغلونې اووم پړوا سياليو ترسره کېدل، د المپيک، بدني روزنې او ورزش عمومي رياست غوره او د قدر وړ اقدام ياد کړ او هيله يې وښوده چې د هرات ولايت ته د ورزش په برخه کې لا زياته پاملرنه وشي.
ورپسې د المپيک، بدني روزنې او ورزش عمومي رییس مولوي احمد الله وثيق وویل؛ خوښ يم چې د هرات تاريخي ولايت د اس ځغلونې اووم پړاو ملي ټاکنيزو سياليو کې ګډون کوم او په دغو مراسمو کې له تاسو سره ځان شريک وينم، نن چې موږ او تاسو د امن او ورورولۍ په فضا کې دلته راټول شوي يو، دا د اسلامي امارت له برکته دي، چې موږ او تاسو يو ځای شوي يو، د دې تر څنګ د اسلامي امارت په راتګ سره ورزش په هيواد کې مخ پر لوړ روان دی او په تېرو درېوو کلونو کې مو ښې لاسته راوړنې لرلې دي، چې تر ډېره پکې د هرات ولايت ورزشکاران هم شامل دي.
ښاغلي وثيق هرات د علم، فرهنګ او هنر کور ياد کړ او په دغه ولايت کې يې د ورزش د ودې لپاره د لا زياتو همکاريو ژمنه وکړه.
نوموړي همدا راز زياته کړه؛ چې د هرات ولايت په غوښتنه مو د فوټبال د افغانستان د اتلانو ليګ چې په مرکز کابل کې ترسره کېده، سږ کال هرات ته انتقال کړ، ده همداراز د غېږ نيونې پهلوانۍ د ميدان جوړولو په برخه کې ژمنه وکړه او زياته يې کړه چې ياده ژمنه به پوره کوو.
ورپسې د هېواد د ورزش ادارې دالمپيکي چارو او اس ځغلونې ملي فدراسيون رييس داد محمد پاينده اختري خبرې وکړې او په ياده برخه کې يې د هرات ولايت د همکاريو قدرداني وکړه.
ښاغلي اختري د اس ځغلونې سيالۍ د هېواد يو له تاريخي لوبو څخه يادې کړې او هيله يې وښوده چې تلپاتې و اوسي.
نوموړي همداراز د اس ځغلونې په برخه کې د افغانانو اسونه د سيمې په کچه غوره اسونه وبلل او زياته يې کړه چې کوښښ کوو په سمه توګه ترې ګټه واخلو.
ده د خپلو خبرو په اوږدو کې د اسلامي امارت راتګ د ورزش په برخه کې هم ګټور ياد کړ او زياته يې کړه چې د ورزش په تېر تاريخ کې تر اوسه افغانستان دومره لاسته راوړنې نه وې لرلې لکه په تېرو درېوو کلونو کې يې چې لاسته راوړې دي.
دغه سيالۍ د هرات ولايت په کوربتوب په دوو سبکونو (يورغه او سرعتي) کې چې يورغه به په ۸۰۰ او ۱۲۰۰ متره او سرعتي به په ۸۰۰ او ۱۰۰۰ متره واټن کې ترسره کېږي او يوه اوونۍ به دوام وکړي.
تمه ده، چې د دغو سياليو په پايله کې به د ۱۱ ولايتونو ۱۲ لوبډلو څخه چې ټول ټال ۱۵۰ اس ځغلونکي او ۱۵۰ اسونه کېږي، په دواړو سبکونو کې ۲۰ اسونه او ۲۰ اس ځغلونکي د هېواد په کچه د ملي لوبډلې لپاره وټاکل شي.
د يادونې وړ ده، چې د دغو سياليو د پيل په مراسمو کې د اس ځغلونې او پارکور د ورزشکارانو ترمنځ ورزشي نندارې هم ترسره شوې او نن به په رسمي توګه د يادو سياليو لومړۍ لوبه ترسره شي.