بادغيس ولایت کې د اسلامي نظام ثبات، د ولسونو د يووالي او انسجام لويه ولسي غونډه د سرحدونو، قومونو او قبایلو چارو وزارت د جرګو او قبایلو چارو د همغږۍ مرستیال مولوي محمد علي جان احمد او مل پلاوي لخوا داسي مهال ترسره شوه، چې پکې د ياد ولایت والي، ولسوالانو، دیني عالمانو او قومي سپين ږيرو برخه اخيستې وه.
د غونډې پرمهال قومي مشرانو ویلي، د بادغيس خلک تېر ۲۰ کاله د اسلامي امارت ترڅنګ ولاړ وو او اوس يې هم د هر حکم هرکلی کوي.
همدارنګه قومي مشرانو له مسولينو سره د خپلو ولسونو ځيني ستونزې شريکې کړې، چې پکې ځوانانو ته د اقتصادي پياوړتيا په موخه کاري زمینو، د وېجاړو سړکونو رغونه او نورې لومړنۍ ستونزې شاملې وې.
ورپسي د جرګو او قبایلو چارو د همغږۍ مرستیال مولوي محمد علي جان احمد په خپلو خبرو کې افغانان پیاوړي خلک ياد کړي او دا يې د افغانانو لپاره لوی افتخار بللی، چې الله ج دوی د جهاد لپاره غوره کړي.
مولوي محمد علي جان احمد ویلي؛ افغانان په نننۍ نړۍ هغه څوک دي، چې خلک په ډېره درنه سترګه ورته ګوري، ځکه افغانانو جهاد وکړ او الله ج عزت ورکړ.
نوموړي همدارنګه زیاته کړې؛ په افغانستان کې د جهاد په برکت د کفارو ارمانونه خاورې شول او دا ټول د دې ولس د همکارۍ، یووالي او قربانیو برکت وو.
د جرګو او قبايلي چارو د همغږۍ رییس شيخ نيک محمد افغاني او د کوچیانو د څړځايونو اقتصادي چارو رییس مفتي لعل محمد منيب ګډونوالو ته د اسلامي امارت د غوره سياست بيلګې وړاندي کړي او ویلي یې دي؛ په تېر ۲۰ کلن اشغال کې د سیاستونو په نوم خلک وغولول شول خو تېرو تجربو افغانانو ته وښوده، چې دا هېواد راته پردي خلک نه جوړوي په کار ده، چې موږ خپله لاس په کار شو ترڅو د بل له احتیاجه خلاص شو.