د ریاستالوزرا اقتصادي مرستیال ملا عبدالغني برادر اخوند په شتون کې نن د روان ۱۴۰۳ لمریز کال د جدې میاشتې په څلورمه نېټه د کانونو او پټرولیم وزارت او خصوصي شرکت ترمنځ د لوګر سیمنټو تولیدي کارخونې تړون لاسلیک شو.
دغه کارخونه د لوګر ولایت په التمور سیمه کې موقعیت لري، چې خصوصي شرکت به یې د جوړولو لپاره شاوخوا ۱۴۵ میلیون ډالر پانګونه کوي او په ورځني ډول به د دوه زره او ۵۰۰ ټنه سیمنټو د تولید ظرفیت ولري.
په دغه کارخونه کې به سلګونو هېوادوالو ته کاري زمینه برابره او همدا راز به د خصوصي شرکت له لوري د سیمې اوسېدونکو ته په روغتیايي او ښوونیزو برخو کې هم خدمات وړاندې شي.
د یادونې وړ ده، چې د اسلامي امارت په راتګ سره د کانونو او پټرولیم وزارت او خصوصي سکټور ترمنځ د سیمنټو د څلورو سترو پروژو قراردادونه لاسلیک شوي، چې شاوخوا ۶۲۳ میلیون ډالره پانګونې پهکې کیږي او اوسمهال یې کارونه په چټکۍ سره روان دي.