د هرات ولایت په مرکز کې د سرحدونو، قومونو او قبایلو چارو وزارت له لوري د اسلامي نظام ثبات، د ولسونو د یووالي او انسجام ستره غونډه په داسې حال کې تر سره شوه، چې پر مهال یې د یاد وزارت د جرګو او قبایلو چارو د همغږۍ مرستیال مولوي محمد علي جان احمد، مل پلاوي، د هرات والي شیخ مولوي اسلام جار او د محلي ادارو مسولینو ګډون درلود.
په غونډه کې د جرګو او قبایلي چارو د همغږۍ مرستیال مولوي محمد علي احمد ناستو خلکو ته وویل؛ په افغانستان کې د اسلامي نظام راتلل د افغانانو ارزو وه او د دې لپاره یې قربانۍ ورکولې.
نوموړي زیاته کړې؛ د اسلامي امارت په راتګ سره په افغانستان کې قومیت، تبعیض، سمت پرستي ختمه شوې ده، ټول ولس پر یوه ټغر را ټول دی.
ښاغلي احمد په خپلو خبرو کې د تېر ۲۰ کلن جهاد په دوران کې د افغانانو قربانۍ وستایلې او دا نظام یې د خلکو نظام یاد کړ.
همداراز قومي مخورو په خپلو خبرو کې د اسلامي امارت په راتګ خوښي وښوده او له اسلامي امارت څخه یې مننه وکړه، چې له توپیر پرته د ټولو قومونو ترمنځ د اتحاد او همکارۍ توازن ساتي.
دوی د هرات ولایت اړوند د مکاتبو، ځمکو، د اوبو د نه شتون او یو لړ نورې ستونزې شریکې کړې او له حکومت څخه یې د حل غوښتنه وکړه.
د غونډې په پای کې د جرګو او قبایلي چارو د همغږۍ رییس شیخ نیک محمد افغاني وویل؛ د سرحدونو، قومونو او قبایلو چارو وزارت د کال په جریان کې د هېواد په ٣٤ ولایتونو کې له ولسونو سره د یووالي او همغږۍ غونډې جوړوي چې په ترڅ کې یې د دوی ستونزې اوري او د حل هڅه یې کوي.