د کرنې، اوبو لګولو او مالدارۍ وزارت، د کرنې او مالدارۍ مرستیال مولوي صدراعظم عثماني د افغانستان لپاره د ملګرو ملتونو د خوړو او کرنې ادارې له رییس ریچارډ ټرانچارد سره لیدنه کړې.
په دې لیدنه کې د کارونو په همغږۍ، د کرنې، مالدارۍ او اوبو لګولو پروژو پرمختګ، د سړو خونو جوړولو او د نړیوال بانک او نورو بهرنیو بنسټونو د مرستو په شفاف مصرف ټینګار شوی.
ریچارډ ټرانچارد د ناستې په پیل کې د ۲۰۲۵ کال لپاره د دې ادارې د ۱۵۰ میلیونه ډالرو د نوې مرستې د ژمنې خبر ورکړی او د پروژو د ښه پلي کېدو لپاره یې د ګډې همکارۍ پر اړتیا ټینګار کړی.
مولوي عثماني د ملګرو ملتونو د خوړو او کرنې ادارې د مرستو، په ځانګړې توګه د کروندګرو او مالدارانو لپاره، مننه کړې او ډاډ یې ورکړ چې دا وزارت به په ټولو پروژو کې همغږي او همکاري کوي، څو ستونزې حل شي.
په دې غونډه کې د پروژو لومړیتوب ټاکلو، د چکډېمونو جوړولو، د حیواني خوراکې برابرولو او د پروګرامونو د شفافیت او اغېزمنتیا تضمین موضوعات هم څېړل شوي دي.