د پېښو پر وړاندې د مبارزې ملي ادارې او د AAR Japan خیریه موسسې ترمنځ د ۵۰۲ زره او ۲۹۶ ډالرو په ارزښت د ګډو همکاریو هوکړهلیک لاسلیک شوه.
د پېښو پر وړاندې د مبارزې ملي ادارې رییس ملا نورالدین ترابي د AAR Japan خیریه موسسې له رییس محمد بشیر باصر سره په خپل کاري دفتر کې لیدنه کړې او د ګډو همکاریو هوکړهلیک یې ورسره لاسلیک کړی.
په دې ناسته کې ملا نورالدین ترابي د یادې موسسې پلاوي ته ښه راغلاست ویلو ترڅنګ ویلي، د پېښو پر وړاندې د مبارزې ملي ادارې تل هڅه کړې چې د هغو موسسو سره همکاري وکړي چې په بشري چارو کې فعالیت کوي.
نوموړي زیاته کړې، له موسسو څخه تمه کوو ترڅو د زیاتو مرستو په جذب اومستحقینو ته یې په شفافه او پر وخت وېش کې لا زیاتې هڅې وکړي.
همدارنګه، د AAR Japan موسسې رییس محمد بشیر باصر د پېښو پر وړاندې د مبارزې ملي ادارې له همکارۍ او د موسسو د ستونزو د هوارولو په برخه کې د هغه له جديت څخه مننه کړې او ویلي یې دي، د دې موسسې کارکوونکي په مرکز او ولایتونو کې له مرسته کوونکو ادارو سره بشپړه همکاري کوي.
د یادونې وړ ده، چې د لاسلیک شوې هوکړې له مخې به یاده موسسه د ۵۰۲ زره او ۲۹۶ ډالرو په ارزښت د کابل ښار او د زابل ولایت په شملزایي، شینکي، نرنګ او جلدک ولسوالیو کې د ماینونو او ناچاودو مهماتو د خطرونو په اړه د عامه پوهاوي پروګرامونه ورکړي.
یاده پروژه درې اساسي برخې لري؛ په ټولنه کې د چاودېدونکو توکو په اړه د ښوونې او روزنې سیسټم رامنځته کول، د رسنیو او ښوونیزو موادو له لارې د ماینونو او ناچاودو توکو د خطرونو په اړه د عامه پوهاوي وړاندې کول او په ټولنه کې د ماینونو او ناچاودو مهماتو د خطرونو په اړه د ښوونیزو فعالیتونو د اغېزمنتیا ارزونه، چې په پلي کېدو سره به یې په یادو برخو کې هېوادوالو ته عامه پوهاوی ورکړل شي.