د عامې روغتیا وزارت روغتیایي خدمتونو وړاندې کولو مرستیال مولوي عبدالولي حقاني خوست ته د سفر پرمهال دې ولایت کې د نږدې اووه میلیونه افغانیو په ارزښت د څلورو نیمه پاتې روغتیایي مرکزونو د رغنیزو چارو پرانیسته وکړه.
په دې اړه جوړو شویو مراسمو کې د عامې روغتیا وزارت د روغتیایي خدمتونو وړاندې کولو مرستیال مولوي عبدالولي حقاني وویل؛ د امیرالمؤمنین حفظه الله په ځانګړې لورینې ټول هېواد کې ۱۷۴ نیمه پاتې روغتیایي پروژو لپاره څلور میلیارده او ۵۵۶ میلیونه افغانۍ بودیجه ځانګړې شوې، چې عملي چارې یې له خوست ولایت څخه پیل شوې.
مولوي عبدالولي حقاني زیاته کړه، د دغو نیمه پاتې پروژو څخه به یې څلور په خوست او پینځه په ننګرهار کې د روان کال تر پای بشپړې شي او پاتې نورې به یې په راتلونکو دوو کلونو کې پاې ته ورسېږي.
د نوموړي په وینا، د دې روغتیایي مرکزونو د رغنیزو چارو له تکملېدو وروسته ورته طبي وسایل او مسلکي پرسونل په پام کې نیول شوی، چې ورسره به ټول هېواد کې روغتیایي خدمات لا پراخ او د خلکو د لاس رسي کچه به زیات شي.