د سرحدونو، قومونو او قبايلو چارو وزارت وایي، د بلخ ولايت په چمتال ولسوالۍ کې د دوو کورنيو ترمنځ اووه کلنه شخړه د يوې غونډې په ترڅ کې حل شوه.
په دې غونډه کې د ياد ولايت د سرحدونو، قومونو او قبايلو چارو رياست مسولينو په مشرۍ، قومي مشرانو او ديني عالمانو ونډه درلودله.
دغه شخړه چې د ښکېلو لوريو لخوا د ځمکې د ملکيت پر سر راپورته شوې وه او ترمنځ يې د ژورو جنجالونو او اختلافاتو ترڅنګ ګڼ مالي زيانونه لرل، وروسته له اوو کلونو د اسلامي امارت د مشرانو په هلو ځلو حل او دواړه خواوې د سولۍ په ټغر سره کېناستې.
په ورته مهال د همدې ولايت په دولت اباد ولسوالۍ کې هم دوې مرورې کورنۍ د خپلمنځي تاوتریخوالي او ژورو جنجالونو ورسته د سرحدونو، قومونو او قبايلو چارو رياست د مسولينو او مصلحينو په هلوځلو پخلا شوې، چې لومړی د دواړو کورنيو له مشرانو سره جلا جلا ناستې وشوې، اختيارليکونه ترې واخیستل شول او د يوې عادلانه پريکړې له مخې يې سوله ييز ژوند پيل کړ.
د يادو ښکېلو کورنيو مشرانو د اسلامي امارت له مسولينو په مننې کولو سره ژمنه کړې، چې تر دې وروسته به له يو بل سره هیڅ جنجالونه نه کوي بلکې د ورورۍ ژوند به سره کوي.