د چاپېریال ساتنې ملي ادارې عمومي رییس مولوي مطیع الحق خالص مرسي کورپس (Mercy Corps) نړيوالې موسسې له تخنيکي مشاور کرن سره په خپل کاري دفتر کې لیدنه کړې او د اوبو مديريت په اړه يې ورسره خبرې کړي.
په پیل کې د مرسي کورپس نړيوالی موسسې تخنيکي مشاور په افغانستان کې د خپلو فعالیتونو د څرنګوالي په تړاو معلومات وړاندې کړي.
نوموړي ویلي؛ موږ په افغانستان کې د اوبو د مديريت په اړه په يو پروپوزل باندې کار کوو او په دې برخه کې ستاسو همکاري اړينه ده، ترڅو وکولی شو د افغانستان اسلامي امارت د پالیسي اړونده مخکې لاړ شو، ترڅو د وچکالۍ سره په ښه ډول مبارزه ترسره شي.
د چاپېریال ساتنې ملي ادارې عمومي رییس مولوي مطیع الحق خالص د مرسي کورپس نړيوالی موسسې تخنيکي مشاور هر کلی کړی او ویلي يې دي؛ د اوبو مديريت یو بشري اړخ لري او دا د ډېر اهميت وړ موضوع ده، چې اسلامي امارت په خپلو لومړیتوبونو کې ورته ځای ورکړی.
نوموړي زیاته کړې؛ د افغانستان ۱۸سلنه طبعي يخچالونه د اقليمي بدلونونو له کبله اوبه شوي دي او دا دې ښکارندويې کوي چې افغانستان د وچکالۍ خوا ته روان دی، ښه بيلګه يې د هېواد جنوب غرب زون د وروستيو کلونو وچکالي ده.
مولوي مطیع الحق خالص ویلي؛ په ورستيو کلونو کې د ځمکې لاندې اوبو څخه په غیري معياري ډول استفاده د دې سبب شوې، چې د ځمکي لاندي اوبه کمې شي چې يواځي د کابل اوبه د ۱۱۰ څخه تر ۱۲۰ مترو پورې ښکته تللي دي.
ښاغلي خالص زياته کړې؛ د اوبو مديريت او مهارول په بېلابېلو امارتي ادارو پورې اړه لري او موږ هم پدې برخه کې کار کوو ترڅو ټولې امارتي ادارې خپل لومړيتوبونه په پام کې ونیسي او له تاسو سره يې شريک کړي.
همدارنګه د لیدنې په پای کې د ګډ کار کولو ژمنه شوې او ټینګار شوی، چې د دواړو خواوو څخه تخنيکي ټيمونه معرفي شي ترڅو د اوبو مديريت پر طرحو کار وشي او لازم اجرات ترسره شي.