د ملي دفاع وزارت وایي، د دې وزارت اړوند د بېلابېلو قطعاتو او سیمهییزو قول اردوګانو ۴۱۲ تنه ځوان منسوبين د عبدالله بن مسعود رضي الله عنه د جګړهایزو ګډو زده کړو قوماندانۍ له درې میاشتنیو مسلکي زده کړو څخه د یو لړ مراسمو په ترڅ کې فارغ شول.
په دې مراسمو کې د تعلیماتو او پرسونل معینیت مرستیال مولوي باز محمد حمیدي ترڅنګ ګڼ شمېر مسولینو، مجاهدینو او منسوبینو ګډون درلود.
مولوي باز محمد حمیدي یادو فارغانو ته د وینا پر مهال ویلي؛ له خلکو سره ښه چلند وکړئ، د اسلامي ملي اردو په لیکو کې د اخوت او ورورولۍ فضا رامنځته او له کبر، غرور او تعصب څخه ځان وساتئ او در سپارل شوي مسولیتونه د شريعت په رڼا کي سرته ورسوئ.
ورته مهال نویو فارغانو مسولینو ته ډاډ ورکړی، چې په هر ډول شرایطو او د هېواد په هر ګوټ کې خدمت لپاره چمتو دي.